నేను కవిని కాదు రచయితను కాదు
నేను చిత్రకారుడిని కాదు చరిత్రకారుడిని కాదు
నాకు స్పందించే హృదయమూ లేదు
ప్రకృతిని ఆస్వాదించే సమయమూ లేదు

నాకీ ప్రపంచాన్ని ఎదిరించే ధైర్యం కానీ పోరాడే గుణం కానీ లేదు
కాలం తో పాటు సాగి పోతాను
నొప్పి కలిగితే బాధ పడతాను మంచి జరిగితే పొంగి పోతాను
నాకు అన్యాయం జరుగుతున్నా నేనింతే

మనస్సుకు తోచింది రాయటానికి కవినో రచయితనో అవ్వాలా
గీతలు గియ్యటానికి చిత్రకారుడినే అవ్వాలా
కూనిరాగం తీయటానికి గాయకుడినే అవ్వాలా
లయబద్దంగా కదలటానికి నాట్యకారుడినే అవ్వాలా

నాఈ ఆకలిపోరాటంలో
నన్ను పిరికిపంద అని ఎగతాళి చేసినా
నిన్ను చూస్తుంటే జాలేస్తుందని గేలి చేసినా
పెదవి కదపక సాగిపొయ్యే సగటు మనిషిని

అయితేనేం
నా హృదయం నవనీతమ్
నా మనస్సు సున్నితమ్
నా మాట మృదు మధురం

సంస్కారం సహజత్వం నా ఆభరణం శీలం నా సర్వస్వం
సంస్కృతి అంటే ప్రాణం సంప్రదాయం అంటే అభిమానం
నీతి నిజాయితీ నిర్మలత్వం నిరాడంబరత్వం
ఇవే నా సిరి సంపదలు